Category: Manşet

Son dövrlərdə Azərbaycan televiziya məkanında müşahidə olunan dəyişikliklər artıq təkcə kosmetik yenilənmə deyil, sistemli və strateji transformasiya kimi qiymətləndirilir. Xüsusilə son bir ay ərzində efir siyasətində aparılan islahatlar həm məzmunun keyfiyyətinə, həm də televiziya institutunun cəmiyyət daxilində roluna yenidən baxılmasına səbəb olub. Bu dəyişikliklər uzun illər tənqid olunan problemlərin aradan qaldırılmasına yönəlmiş kompleks yanaşmanın nəticəsi kimi diqqət çəkir.

Uzun müddət Azərbaycan televiziya kanallarında müşahidə olunan əsas problemlərdən biri məzmunun səviyyəsinin aşağı düşməsi, etik normaların pozulması və reytinq naminə populist yanaşmaların üstünlük təşkil etməsi idi. Xüsusilə gündüz və axşam proqramlarında qalmaqal, süni emosiyalar, şəxsi həyatın ifşası və bəzən cəmiyyət üçün mənfi nümunələr yaradan diskussiyalar geniş yer alırdı.

Bu vəziyyət haqlı olaraq tədricən “efir deqradasiyası” kimi xarakterizə olunmağa başlamışdı. Media ekspertləri və ictimaiyyət nümayəndələri dəfələrlə vurğulayırdılar ki, televiziya yalnız kommersiya platforması deyil, eyni zamanda ictimai şüurun formalaşdırılmasında mühüm rol oynayan maarifləndirici, bilgiləndirici alətdir. Bu səbəbdən efirin keyfiyyətinin aşağı düşməsi birbaşa cəmiyyətin mədəni və intellektual səviyyəsinə təsir göstərir.

Son dövrlərdə televiziya kanallarında aparılan dəyişiklikləri bir neçə əsas istiqamət üzrə qruplaşdırmaq mümkündür:

1. Qalmaqallı proqramların məhdudlaşdırılması

Ən diqqətçəkən dəyişikliklərdən biri ictimai qınaq doğuran, etik çərçivələri aşan proqramların ya bağlanması, ya da formatının dəyişdirilməsidir. Bu, efirin daha sağlam informasiya mühiti kimi formalaşdırılması istiqamətində mühüm addım hesab olunur.

2. Maarifləndirici kontentin artması

Yeni yanaşma çərçivəsində analitik, maarifləndirici və ictimai əhəmiyyət daşıyan proqramların sayı artırılıb. Bu proqramlar sosial problemlərin müzakirəsinə, ictimai şüurun inkişafına və məlumatlılığın artırılmasına xidmət edir.

3. Etik standartların gücləndirilməsi

Aparıcıların davranışı, istifadə olunan dil, mövzuların təqdim olunma forması daha ciddi nəzarət altına alınıb. Bu, efir mədəniyyətinin formalaşması baxımından mühüm mərhələdir.

4. Ailə və milli dəyərlərin qorunması

Yeni kontent siyasətində milli-mənəvi dəyərlərin qorunması əsas prioritetlərdən birinə çevrilib. Xüsusilə ailə institutuna zidd məzmunun məhdudlaşdırılması bu istiqamətdə atılan addımlar sırasındadır.

Hazırkı proseslər çox vaxt “efirin təmizlənməsi” kimi xarakterizə olunur. Bu ifadə sadəcə texniki dəyişiklikləri deyil, həm də ideoloji və mədəni transformasiyanı əhatə edir.

Bu fenomenin bir neçə mühüm aspekti var. Sosial aspekt olaraq cəmiyyətin sağlam informasiya mühitinə ehtiyacının təmin edilməsini göstərə bilərik. Və ya mədəni aspekt kimi milli dəyərlərin və mədəni identikliyin qorunması, psixoloji aspekt kimi tamaşaçı zövqünün formalaşdırılması və manipulyasiyaların qarşısının alınması və nəhayət siyasi aspekt kimi informasiya təhlükəsizliyinin gücləndirilməsi olduqca əhəmiyyətli məqamlardır.

Bu baxımdan efirdə aparılan dəyişikliklər yalnız media sahəsində deyil, ümumilikdə ictimai həyatın müxtəlif sahələrində təsir göstərən genişmiqyaslı prosesdir.

Televiziya ilə cəmiyyət arasındakı münasibət hər zaman qarşılıqlı təsir üzərində qurulub. Lakin son dəyişikliklər bu münasibətlərin daha balanslı və şüurlu formaya keçdiyini göstərir. Əvvəllər televiziya daha çox tamaşaçı zövqünü formalaşdıran tərəf kimi çıxış edirdisə, indi artıq tamaşaçıların tələbləri də efir siyasətinə ciddi təsir göstərir. Sosial şəbəkələrin geniş yayılması, alternativ informasiya mənbələrinin artması televiziya kanallarını daha məsuliyyətli olmağa məcbur edir. Bu kontekstdə son islahatlar həm də ictimai sifarişin nəticəsi kimi qiymətləndirilə bilər. Tamaşaçılar artıq daha keyfiyyətli, daha obyektiv və daha etik kontent tələb edir və televiziya bu tələblərə uyğunlaşmağa çalışır.

Bununla yanaşı, televiziya kanalları üçün ən böyük çağırışlardan biri reytinq və keyfiyyət arasında balansın qorunmasıdır. Doğrudur, kommersiya televiziya modellərində reytinq əsas göstəricilərdən biri olaraq qalır və lakin bu, bəzən keyfiyyətli kontentin ikinci plana keçməsi üçün əsas deyil, ola bilməz.

Son dəyişikliklər də onu göstərir ki, uzunmüddətli perspektivdə keyfiyyətli kontent də auditoriya qazana bilir. Bu isə televiziya rəhbərlikləri üçün yeni bir modelin formalaşmasına zəmin yaradır: keyfiyyət + sosial məsuliyyət + davamlı auditoriya

Hazırkı tendensiyalar göstərir ki, Azərbaycan televiziya məkanı yeni inkişaf mərhələsinə qədəm qoyur. Əgər bu islahatlar davamlı xarakter alarsa, yaxın gələcəkdə bir sıra nəticələr əldə oluna bilər. Məsələn, daha peşəkar və məsuliyyətli jurnalistika mühiti formalaşacaq, eyni zamanda televiziya cəmiyyətin maarifləndirilməsində daha aktiv rol oynayacaq. Bu islahatlar eyni zamanda milli mədəniyyət və dəyərlər daha güclü şəkildə təbliğ olunmasına və informasiya təhlükəsizliyi sahəsində möhkəm əsasların yaranmasına təkan verəcək. Nəticədə televiziya ilə rəqəmsal media arasında da daha sağlam inteqrasiya modeli formalaşa bilər ki, bu da ümumi media ekosisteminin inkişafına təkan verəcək.

Azərbaycan televiziya məkanında son bir ayda baş verən dəyişikliklər təsdiq edir ki, efir siyasətində yeni yanaşma formalaşır. Bu yanaşmanın əsasını məsuliyyət, keyfiyyət və ictimai maraqların qorunması təşkil edir.

“Efirin təmizlənməsi” kimi xarakterizə olunan bu proses əslində daha geniş məna daşıyır – bu, cəmiyyətin informasiya mədəniyyətinin yüksəldilməsi, milli dəyərlərin qorunması və media institutunun yenidən formalaşdırılması deməkdir. Əgər bu kurs ardıcıl şəkildə davam etdirilərsə, Azərbaycan televiziya məkanı yalnız ölkə daxilində deyil, regionda da nümunəvi media modelinə çevrilə bilər.

Aslan Vəliyev

Prezident İlham Əliyev “Sülh və Barışıq üçün Gernika mükafatı”na layiq görülüb.

“Qafqazinfo”  xəbər verir ki, İlham Əliyev bu haqda mükafatın təqdimolunma mərasiminin iştirakçılarına müraciətində bildirib.

“Azərbaycan ilə Ermənistan arasında sülhün əldə olunması və dialoqun təşviqi istiqamətində göstərdiyim səylərə görə “Sülh və Barışıq üçün Gernika mükafatı”na layiq görülməyim ilə əlaqədar Gernika-Lumo və Pforshaym şəhər Şuralarına, Gernika Sülh Muzeyinə, Mədəniyyət evinə və “Gernika Qoqoratuz” Sülh Araşdırmaları Mərkəzinə dərin minnətdarlığımı ifadə edirəm.

Gernika şəhərinin tarixindən irəli gələn sülh və barışıq mesajı bütün xalqlar üçün mühüm əhəmiyyət kəsb edir. Müharibələrin acı nəticələrini yaşamış xalqların xatirəsi və təcrübəsi gələcək nəsillərin daha sabit və təhlükəsiz dünyada yaşaması üçün mühüm dərs olmalıdır.

30 ilə yaxın müddət ərzində münaqişə şəraitində yaşamış, müharibənin ağır fəsadları ilə üzləşmiş Azərbaycan xalqı da sülhün və barışığın dəyərini çox yaxşı anlayır. Azərbaycan bu gün sülh şəraitində yaşamağın nə olduğunu öyrənir. Bu, bizim üçün yeni və qeyri-adi bir hissdir. Çünki müstəqilliyimizi bərpa edəndən bəri biz bu hissi yaşamamışdıq.

2025-ci ilin avqustunda Vaşinqton şəhərində baş tutmuş tarixi Zirvə Görüşündə Azərbaycan və Ermənistan arasında sülh sazişinin mətni paraflanmış, eyni zamanda Birgə Bəyannamə imzalanmışdır. Bununla da üç onillik ərzində davam edən münaqişə tamamilə sona çatmış, xalqlarımız üçün sülhün, barışığın, qarşılıqlı tərəfdaşlıq dövrünün əsası qoyulmuşdur.

Hazırda Azərbaycan bu yeni reallığa və sülh mühitində yaşamağa uyğunlaşır. Ümumi müsbət atmosfer, sabitliyə və təhlükəsizliyə daha çox inam bizi irəliləməyə və inkişaf gündəliyimizə daha çox vaxt və resurs ayırmağa imkan verir. Biz eyni zamanda sülhü möhkəmləndirmək və onu əməli fəaliyyətə çevirmək üçün addımlar atırıq və artıq hər iki cəmiyyətimiz sülhün iqtisadi, ticari və digər sahələrdə real faydalarının şahidi olur. Bu gün artıq Azərbaycanın neft məhsulları, üçüncü ölkələrdən taxıl və digər məhsullar ölkəmizin ərazisindən keçməklə Ermənistana ixrac edilir.

İki ölkə arasında etimad quruculuğu tədbirləri davamlı sülhün bərqərar olmasında mühüm rol oynayır. Dövlət səviyyəsində atılan addımlarla yanaşı, vətəndaş cəmiyyətinin nümayəndələri arasında mütəmadi görüşlər bu prosesə müsbət töhfəsini verir.

Azərbaycanın və Ermənistanın nümunəsi göstərir ki, uzunmüddətli münaqişəyə, iztirablara və qarşılıqlı etimadsızlığa baxmayaraq, güclü siyasi iradə və beynəlxalq dəstək mövcud olduqda sülh əldə etmək mümkündür.

Hörmətli dostlar,

“Sülh və Barışıq üçün Gernika mükafatı” yalnız artıq əldə olunmuş nailiyyətlərin tanınması deyil, həm də beynəlxalq birliyin ortaq rifahı, sülh naminə atılacaq gələcək addımlar baxımından mühüm ruhlandırıcı stimul və məsuliyyətdir.

Bu mükafata görə bir daha təşəkkürümü ifadə edir, sülh, dialoq və qarşılıqlı anlaşmanın təşviqi istiqamətində fəaliyyətinizdə hər birinizə uğurlar arzulayıram”, – müraciətdə deyilir.

Xəbər verdiyimiz kimi, bu gün ABŞ Prezidenti Donald Trampın da iştirakı ilə keçirilən tədbirdə atışma baş verib.

“Qafqazinfo” xəbər verir ki, hadisə Bakı vaxtı ilə səhər saatlarında ABŞ paytaxtında “Washington Hilton” hoteldə olub.

Hadisəni törədən şəxsin Kaliforniyanın cənub-qərb ətraflarında yaşayan 31 yaşlı Kol Tomas Allen olduğu məlum olub. Hazırda həmin şəxs polis nəzarətindədir.

“Vaşinqtonda keçirilən Ağ Ev Müxbirləri Assosiasiyasının şam yeməyində baş verən atışma məni dərindən sarsıtdı”.

“Qafqazinfo” xəbər verir ki, bu barədə Azərbaycan Prezidenti İlham Əliyev “X” sosial şəbəkə hesabında paylaşım edib.

“Belə zorakılıq halları qəbuledilməzdir və qəti şəkildə pislənməlidir. Prezident Trampın, Birinci xanımın və bütün iştirakçıların təhlükəsiz olması sevindiricidir. Onlara davamlı təhlükəsizlik və rifah arzulayıram”, – deyə Dövlət başçısı vurğulayıb.

ABŞ Prezidenti Donald Trampın iştirak etdiyi Ağ Ev Müxbirləri Assosiasiyasının qəbulunda baş verən atışmanı törətməkdə şübhəli bilinən şəxsin kimliyi məlum olub.

“Qafqazinfo” “CBS News”a istinadən xəbər verir ki, o, Kaliforniyanın cənub-qərb ətraflarında yaşayan 31 yaşlı Kol Tomas Allendir.

Məlumata görə, həmin şəxs polis nəzarətindədir.

ABŞ Prezidenti Donald Tramp Vaşinqtonda “Hilton” hoteldə keçirdiyi Ağ Ev Müxbirləri Assosiasiyasının qəbulunda atışma olub.

“Qafqazinfo” “Reuters”ə istinadən xəbər verir ki, zalda əvvəlcə güclü partlayışlar baş verib bundan sonra isə izdiham yaşanıb.

Tədbirdə Prezident Trampla yanaşı birinci xanım Melaniya Tramp, vitse-prezident Ceyms Devid Vens və Kerolayn Livitt də iştirak edib.

Mənzillərdə fərdi istilik sistemlərinin, yəni kombilərin dövrü məhdudlaşır.

“Qafqazinfo” xəbər verir ki, Nazirlər Kabinetinin yeni qərarı ilə binalar layihələndirilərkən artıq hündürlük faktoru əsas götürüləcək.

Yeni qaydalara görə, yalnız 5 mərtəbəyə qədər olan binalarda fərdi istilik sisteminə icazə veriləcək.

Qərarda alternativ yollar da göstərilib. Əgər ərazidə qaz yoxdursa və ya istilik bərpa olunan enerji mənbələri – məsələn, günəş panelləri ilə təmin ediləcəksə, fərdi sistemlərə icazə verilə bilər. Digər hallarda isə əsas yük 2025-ci ildən etibarən genişlənəcək mini qazanxanaların üzərinə düşəcək. Bu, həm də binaların vahid mərkəzdən və daha təhlükəsiz qızdırılması deməkdir. Yeni qaydalar həm tikinti şirkətləri, həm də mənzil alacaq vətəndaşlar üçün yeni standartlar formalaşdırır.

Artıq mənzil seçərkən binanın neçə mərtəbəli olması və istilik sisteminin növü əsas şərtlərdən biri olacaq.

Daha ətraflı “Xəzər TV”nin videomaterialında:

ARB TV-nin tanınmış aparıcısı Zaur Kamal yenidən efirə qayıdacaq.

“Qafqazinfo” Manset.az-a istinadən xəbər verir ki, Zaur Kamal mayın 4-də ARB TV-də adı hələlik bəlli olmayan proqramla efirə çıxacaq.

Teleaparıcının “Həmin Zaur” layihəsinin adı dəyişdirilərək, başqa adla təqdim ediləcək.

Qeyd edək ki, ötən ay tanınmış aparıcılar Zaur Baxşəliyevin təqdimatında olan “Bizimləsən” və Zaur Nəbioğlunun “Rəngarəng” verilişləri, eləcə də, Xoşqədəm Hidayətqızı və Zaur Kamalın proqramları efirdən çıxarılıb. Buna səbəb kimi həmin proqramların bayağılığı və etik normalara uyğunsuzluğu göstərilib.

***

ARB TV-nin direktor müavini Vüsalə Vəliyeva Zaur Kamalın açıqlamasını təkzib edib:

“Zaur Kamalın verdiyi açıqlama və özünün etdiyi paylaşım yanlışlıqla olub. O, ümumiyyətlə, efirdə olmayacaq. ARB-də yeni layihələr gözlənilir. Ola bilər ki, həmin studiyalardan istifadə edilsin”.

***

Zaur Kamal efirə qayıdacağına dair paylaşım etsə də, təkzibdən sonra həmin paylaşımı instaqram hesabından silib.

İran Prezidenti Məsud Pezeşkian ölkədə enerji istehlakının azaldılması üçün əhaliyə çağırış edib.

“Qafqazinfo” xəbər verir ki, Pezeşkian bunu Tehran şəhərində İdman və Gənclər Nazirliyinə səfəri zamanı jurnalistlərə açıqlamasında səsləndirib.

“Cəbhə xəttində olan əziz xalqımızdan sadə xahişimiz var: elektrik istehlakını azaldın. Evdə on lampanı yandırmaq əvəzinə, ikisini yandırın. Bunun nə problemi var?”, – deyə o bildirib.

Onun sözlərinə görə, bu cəhdlər ölkə daxilində narazılıq yaratmağa yönəlib və əhali buna imkan verməməlidir.

Müraciət ABŞ-nin tətbiq etdiyi dəniz blokadasının İslam Respublikasının iqtisadi dəhlizlərinə və enerji sisteminə təzyiq göstərdiyi bir vaxtda gündəmə gəlib.

Amerikanın “Politico” nəşri ABŞ dövlət katibi Marko Rubionu 2028-ci il prezident seçkilərində ən güclü namizədlərdən biri kimi təqdim edib.

“Qafqazinfo” xəbər verir ki, Ağ Evə yaxın mənbələr Rubionu xarici münaqişələrin həllindəki effektiv yanaşması və siyasi manevr qabiliyyətinə görə “ciddi fiqur” hesab edirlər.

Nəşr yazır ki, xüsusilə Venesuela lideri Nikolas Maduronun hakimiyyətdən uzaqlaşdırılması istiqamətindəki fəaliyyəti və Donald Trampa sarsılmaz sadiqliyi onun MAGA (Amerikanı Yenidən Böyük Edək) hərəkatı daxilindəki mövqeyini əhəmiyyətli dərəcədə möhkəmləndirib.

Xatırladaq ki, bir müddət əvvəl keçmiş vitse-prezident Kamala Harrisin də 2028-ci ildə yenidən şansını sınayacağı barədə məlumatlar yayılmışdı. “The Washington Post” qəzeti isə prezident postu üçün daha bir sürpriz namizədin adını açıqlayacağını bildirib.