Abşeron rayonunun Güzdək qəsəbəsində güclü yağışlar nəticəsində yaranan daşqınlar əhalini ciddi problemlərlə üz-üzə qoyub. Qəsəbədə bir çox evləri su basıb, vətəndaşların əmlakına ciddi ziyan dəyib.
Sakinlər bildirirlər ki, evlərə dolan su yaşayış üçün təhlükə yaradır, məişət əşyaları və mebellər yararsız hala düşüb. Vətəndaşlar xüsusilə çətin vəziyyətdə olduqlarını və heç bir qurumdan kömək ala bilmədiklərini vurğulayırlar.
“Kömək edən yoxdur, çarəsiz qalmışıq”, – deyə sakinlərdən biri vəziyyəti təsvir edib. Onlar dövlət qurumlarından və aidiyyəti təşkilatlardan təcili yardım gözləyirlər. Daşqın suları qəsəbənin infrastrukturu üçün də ciddi təhlükə yaradır.
Vətəndaşlar qeyd edirlər ki, bu cür hallar Güzdəkdə ilk dəfə deyil və hər dəfə güclü yağışlar zamanı oxşar problemlərlə üzləşirlər. Onlar problemin köklü həlli üçün drenaj sisteminin yaxşılaşdırılmasını və ya digər infrastruktur layihələrinin həyata keçirilməsini tələb edirlər.
Məsələ ilə bağlı aidiyyəti qurumların tez bir zamanda tədbir görməsi və zərər çəkmiş sakinlərin vəziyyətinin yüngülləşdirilməsi vacibdir. Sakinlər özlərinə uzanacaq bir kömək əli gözləyirlər.
Leave a Reply